Ókei, þessi kaka. . . Ég á erfitt með að lýsa henni. Hún er eiginlega ‘the ultimate’ nammiterta, hrikalega var hún góð. Ég borða ekki rjóma og finnst hann alls ekki góður, en ákvað að smakka þessa og það var vel þess virði. Rjómabragðið finnst ekkert heldur bara himneskt karamellubragð og hún hreinlega bráðnar upp í manni. Mun klárlega henda í þessa aftur og mæli með að þið gerið slíkt hið sama.

Rice krispies botn:

• 100 gr suðusúkkulaði frá Nóa Síríus
• 80 gr smjörlíki
• 3 msk sýróp
• 150 gr Nóa Síríus rjómakúlur
• 200  gr Rice krispies (í raun bara eftir smekk hvers og eins)

Bræðið smjörið, súkkulaðið, sýrópið og rjómakúlurnar í potti á vægum hita. Þegar rjómakúlurnar eru alveg bráðnaðar þá má hella Rice krispies saman við og blanda vel með sleikju. Skellt í form og kælt í ísskápnum í ca. klst.

Rjómafylling:

• 250 ml rjómi
• Heill poki af karamellu Nóa Kropp.

Setjið Nóa kroppið í poka og lemjið hann með buffhamri (eða bara einhverju) og blandið síðan saman við þeyttan rjómann.

Marengsbotn:

• 100 gr sykur
• 100 gr púðursykur
• 2 – 3 eggjahvítur
• 1 stk Risa Hraun (smátt saxað).

Þeytið sykurinn, púðursykurinn og eggin vel saman eða þar til blandan er orðin stífþeytt. Skerið hraunið niður, frekar smátt, og blandið út í með sleikju. Bakist við 150°c í ca. 30 – 40 mín.  Til að toppa kökuna bjó ég til smá karamellubráð sem var 150 gr rjómakúlur frá Nóa Síríus og smá rjómasletta, brætt við vægan hita. Skellti því svo yfir kökuna og skreytti með hindberjum og muldu karamellu Nóa Kroppi.

Verði ykkur að góðu

erlaguðmundsdóttir

Mig langaði í smá nammiköku á sunnudaginn og ákvað að kíkja í Krónuna. Mér finnst kókos eitt það besta sem ég fæ ásamt Oreo og varð því þessi blanda til. Ég skal vera alveg hreinskilin, ég var ekki viss um það hvort þessi kaka myndi ganga. En ég get svo svarið það að þessi er ávanabindandi. Ég átti erfitt með að hætta, svo góð er hún. Mæli klárlega með þessari fyrir næsta nammidag eða kaffiboð !

Botn:

• 1 – 1 1/2 kassi af Oreo kexi.
• 100 gr íslenskt smjör (við stofuhita).

Skellið kexinu í matvinnsluvélina og setjið á fullt. Næst kemur smjörið, ég skar það niður í litla bita áður en ég setti það í matvinnsluvélina með oreo kexinu. Þegar kexið og smjörið hafði blandast vel saman, þá skellti ég því í botninn á kökuforminu og þrýsti því vel niður. Skellið botninum inn í kæli á meðan þið gerið fyllinguna.

Fylling:

• 250 ml rjómi
• 300 gr vanilluskyr frá skyr.is
• 1 tsk vanillusykur
• 100 gr hvítir súkkulaðidropar frá Nóa Síríus (brætt).
• 9 litlir bounty bitar
• 3x kókosbollur

Byrjið á því að þeyta rjóminn og bætið síðan skyrinu út í, hrærið varlega saman. Næst fer vanillusykurinn og hvíta súkkulaðið út í, blandið vel.  Ég skar bounty bitana smátt og kókosbollurnar gróft, blandaði því svo saman við blönduna með sleikju. Þá er fyllinginn klár og henni skellt ofan á oreobotninn og geymd inn í kæli í nokkrar klst. Ég gerði kökuna að kvöldi til svo ég geymdi kökuna í kæli yfir nóttu og daginn eftir var hún orðin nógu stíf til þess að ég gæti losað hana úr forminu og skellt henni á kökudisk. Skreytti svo með nokkrum bræddum súkkulaðidropum frá Nóa Síríus.

Verði ykkur að góðu

erlaguðmundsdóttir 

Þessar voru smá tilrauna cupcakes. Ég elska heitt myntusúkkulaði og langaði rosa mikið í einhverskonar köku með súkkulaði og myntu saman og úr varð after eight cupcakes. Kökurnar voru deelish og kremið líka, þó svo að ég hefði viljað fá fallegri lit á kremið, ég setti óvart of mikið af matarlit. En allir sem smökkuðu gáfu þessum mjög góða einkunn og þær kláruðust nánast strax, svo ég held það sé óhætt að baka þessar einhverntíman aftur.

Uppskrift:

• 350 gr hveiti
• 225 gr sykur
• 2 msk kakó
• 1 tsk matarsódi
• 175 gr íslenskt smjör (brætt)
• 2 egg
• 150 ml ab mjólk
• 3 tappar af piparmyntudropum
• 200 gr Myntupipp frá Nóa Síríus (niðurskorið).

Blandið öllum þurrefnunum saman og bætið síðan við smjöri, eggjum, ab mjólk og piparmyntudropunum og hrærið vel. Þegar deigið er orðið brúnt og fínt þá er óhætt að bæta við niðurskornu pippinu. Ég skar pippið ekkert alltof smátt, vildi hafa bitana frekar grófa. Þegar þessu hefur svo öllu verið blandað vel saman þá er bara að setja í formin. Ég keypti mér form hjá Allt í Köku sem er algjör snilld og núna verða kökurnar meiri að ofan heldur en áður hjá mér.
Bakið kökurnar við 180°c í ca. 15 – 20 mín. Ég myndi stinga prjón eða gaffli í miðjuna á einni eftir 15 mín og ef ekkert kemur upp með prjóninum þá er kakan klár.

Krem:

• 250 gr íslenskt smjör
• 4 msk flórsykur
• 1 egg
• 1 tsk vanillusykur
• 3-4 tappar af piparmyntudropum
• smá matarlit
• After eight fyrir skreytingu.

Skerið smjörið i litla bita og skellið í skálina. Hrærið smjörið vel eða þar til það er orðið mjúkt og fínt, áður en þið bætið einhverju öðru út í. Þegar smjörið er klárt má bæta egginu saman við og hræra vel. Næst setjið þið flórsykurinn og vanillusykurinn út í, ég sigtaði sykurinn svo ekki kæmu kekkjir. Næst má setja matarlit og piparmyntudropa eftir smekk. Ég setti ca. 4 tappa af piparmyntudropum í kremið og myntubragðið var eiginlega akkúrat, ekki of mikið og ekki of lítið. Ég keypti mér svo nýjan stjörnustút hjá Allt í Köku og þvílíkur munur á því að gera blóm eða önnur flott skraut á kökurnar, mæli eindregið með þeim ef þið viljið ná fram fallegri skreytingu. Til að toppa kökurnar bræddi ég síðan nokkur After eight með smá rjóma út í og skellti yfir kökurnar. Skar einnig After eight til helminga og setti á kremið.

Ég mæli með því að þið prufið þessar, mig hlakkar til að baka góðan skammt af þeim aftur.

Verði ykkur að góðu

erlaguðdmundsdóttir

Mig langaði að prufa eitthvað nýtt og þá fékk ég hugmyndina að því að búa til Rice krispies botn með Bingókúlum. Ég viðurkenni ég var pínu smeik hvernig það myndi tóna saman. En þetta var síðan svo bara hin besta blanda, hriiikalega góð kaka og hún sló rækilega í gegn. Mæli hiklaust með þessari, kom skemmtilega á óvart.

Botn: 

• 100 gr íslenskt smjör
• 100 gr suðusúkkulaði
• 3 msk sýróp
• 300 gr bingókúlur (150gr í botninn og 150gr brætt sér ofan á.)
• ca. 150 – 200 gr. rice krispies

Hendið öllu í pott og bræðið við vægan hita. Ég setti 150 gr af bingókúlum með smjörinu, súkkulaðinu, sýrópinu og rice krispies. Hin 150 gr bræddi ég sér í pott með smá rjómaslettu út í og skellti síðan yfir botninn þegar hann hafði verið inn í ísskáp í ca. klst.

Ofan á:

• 250 ml rjómi
• 2 stk Risa hraun frá Góu
• 250 gr jarðaber

Þeytið rjómann og saxið hraunsúkkulaðið, frekar gróft, á meðan. Bætið hrauninu saman við rjómann þegar búið er að þeyta hann. Skellið ofan á botninn og skreytið síðan með jarðaberjum.

Verði ykkur að góðu

erlaguðdmundsdóttir

Jæja það er víst meistaramánuður í október og ákvað ég að henda í eina hráköku í tilefni þess. Mér finnst þessi alltaf jafn góð og er hún fullkomin þegar að sykurþörfin kallar.

Botn:

• 100 gr hesilhnetur
• 200 gr döðlur
• 100 gr kókosflögur
• 100 gr kasjúhnetur
• 1 msk hnetusmjör
• 1 msk kakó (ég notaði frá Nóa Síríus)

Byrjið á því að leggja döðlurnar í bleyti í volgt vatnt í smá stund. Hellið síðan vatninu af í vaskinn og setjið döðlurnar í matvinnsluvél. Þegar döðlurnar eru klárar þá tek ég þær úr og set til hliðar á meðan að ég hakka hneturnar. Hendið hnetunum og kókosflögunum saman í matvinnsluvélina og hakkið það gróft niður. Því næst bætið þið við döðlunum, hnetusmjörinu og kakóinu og blandið öllu vel saman. Takið fram kökuform, skiptir ekki máli hvernig það er í laginu, og þjappið blöndunni vel ofan í og kælið. Gott að henda í frystinn, þá er botninn fljótari að harðna. Í millið setti ég svo ca. 5 msk af hnetusmjöri frá Himneskri hollustu og dreifði því vel yfir botninn.

Ofan á:

• 2 msk kókosolía (brædd)
• 2 -3 msk kakó (Nóa Síríus).

eða

• 1 msk kókosolía
• 100 gr 70% súkkulaði frá Nóa Síríus (bræða þetta tvennt saman).

Ég notaði það fyrrnefnda í þetta skipti en hef einnig notað það síðara. Mér finnst bæði mjög gott, en þetta með 70% súkkulaðinu harðnar meira og finnst mér það persónulega betra.

Verði ykkur að góðu

erlaguðmundsdóttir

 

Ég hef haft voða lítinn tíma til þess að baka seinustu daga. Skóli og tvær vinnur eiga líf mitt þessa dagana. Þannig ég ætla að henda inn uppskrift af sjúklega góðri marengstertu sem ég bakaði fyrir Vikuna í sumar, fyrir ykkur sem náðuð ykkur ekki í eintak.

Marengsbotn:

• 150 gr sykur
• 150 gr púðursykur
• 4 eggjahvítur
• 1-2 bollar mulið kornflex

Þeytið eggjahvíturnar og sykurinn vel saman þar til blandan er orðin stíf. Bætið kornflexinu út í og hrærið varlega, gott að gera þetta bara með sleikju. Þið þurfið 2 bökunarplötur með bökunarpappír. Ég tók svo hringlaga kökuform sem ég á hérna heima og strikaði í kringum það á bökunarpappírinn og setti á bökunarplöturnar. Skiptið deiginu jafnt , dreifið vel og fyllið út í teiknuðu hringina. Bakist við 130°c á blæstri í ca. 50 – 60 min.

Fylling:

• 5dl rjómi
• 200 gr Nóa pipp með myntubragði (niðurskorið)
• 4 bollar hrískúlur
• 1/2 bolli bláber
• 150 gr niðurskorin jarðaber.

Þeytið rjóman og bætið pippsúkkulaðinu og hrískúlunum saman við. Dreifið vel úr rjómanum á marengsbotninum og dreifið síðan bláberjum og jarðaberjum yfir rjómann. Setið hinn marengsbotnin ofan á og skreytið. Ég skreytti þessa með bræddu pippsúkkulaði með myntubragði og smá rjóma ásamt því að dreifa meiri jarðaberjum og bláberjum yfir.

Verði ykkur að góðu

erlaguðmundsdóttir

Þessi skyrterta er með bestu skyrtertum sem ég hef smakkað, hún er alveg hættulega góð. Kærastinn minn kom heim eftir vinnu og sá þessa inn í ísskáp, til að gera langa sögu stutta þá held ég að það sé ekki mikið eftir af henni.

Botn:

• Heill Lu Bastogne kex pakki.
• 80 – 100 gr íslenskt smjör.

Brjótið kexið niður í matvinnsuvél og setið hana á fullt þar til kexið er orðið vel mulið. Næst klípið þið smjörið út í, gott að hafa smjörið í ca. 10-15min á eldhúsborðinu áður en það er sett út í, svo það hitni pínu. Ég þrýsti síðan botninum í formið og setti vel upp með hliðunum til þess að búa til skál og fyllti síðan upp í með ostafyllingunni. Skellið botninum inn í kæli á meðan þið útbúið fyllinguna svo hann nái að harðna.

Fylling:

• 250 ml rjómi
• 400 gr vanilluskyr (gæti líka verið gott að nota karamelluskyr frá Kea).
• 1 tsk vanillusykur
• 80 gr hvítar súkkulaðiperlur frá Nóa Síríus (brætt).
• 40 gr karamellu pipp (brætt).
• 2 stór Daim (smátt söxuð).

Byrjið á því að þeyta rjóman og bætið síðan vanillskyrinu saman við. Á meðan rjóminn var að þeytast þá bræddi ég hvíta súkkulaðið í potti við vægan hita og lét það kólna smá áður en ég bætti því við í fyllinguna. Einnig bræddi ég karamellupipp með smá rjómagusu út í við vægan hita til þess að skreyta kökuna með og ákvað að setja pínu af því út í fyllinguna til að fá smá lit. Síðast setti ég vanillusykurinn og daimið, blanda því vel saman. Hellið fyllingunni ofan í botninn og kælið í ísskápnum í smá tíma áður en skreytt er. Í skreytinguna fór 60 gr karamellupipp + smá rjómi og 2 tsk af sýrópi & smá niðurskorið Daim.

Verði ykkur að góðu

erlaguðmundsdóttir

Kærastinn minn átti afmæli í vikunni og var ég búin að ákveða að útbúa þessa handa honum. Því miður fékk hann þó ekki kökuna á afmælisdaginn sinn þar sem haustflensan ákvað að kíkja í heimsókn til mín daginn fyrir og sá til þess að ég hafði ekki orku í neitt, en hann fékk nú samt hrikalega góða bakarísköku á afmælisdaginn. Ég kunni samt ekki við að rjúfa hefðina og ákvað að henda í afmælisköku í morgun áður en ég myndi demba mér í lærdóminn, þetta var meira svona afsökun til þess að byrja ekki á lærdómnum strax, þið kannist kannski við frestunaráráttuna góðu. En allavega þá heppnaðist þessi dásemd mjög vel og mun ég alveg hiklaust henda í eina svona aftur.

Botn:

• 2 1/4 dl Agave sýróp
• 3 egg
• 200 gr íslenskt smjörlíki
• 200 gr 70% súkkulaði
• 1 dl spelthveiti (fínt). Hægt að nota gróft líka en þá er gott að sigta það út í deigið.

Fyrst er Agavesýrópinu og eggjunum blandað saman í skál og látið þeytast vel saman. Á meðan þetta tvennt þeytist þá er gott að bræða smjörið og súkkulaðið saman í potti, við vægan hita. Þegar deigið er orðið fallega kremgult á litinn þá stillum við hrærivélina á 1 og hellum súkkulaðiblöndunni varlega út í, látum það svo blandast vel saman. Því næst má bæta spelthveitinu við og hræra smá. Stillið ofninn á 170°c og blástur, skellið kökunni inn í og bakið í  ca. 25 – 30min, 25min er oftast alveg nóg.

Ofan á:

• 250 ml rjómi
• 150 gr jarðaber (niðurskorin)
• 100 gr góu karamellukúlur

Þeytið rjómann og skerið jarðaberin smátt niður áður en þið blandið þeim saman við. Ég myndi láta kökuna kólna vel áður en þið skelið rjómanum á, best að leyfa henni að kólna smá á borðinu eftir að hún hefur verið tekin úr ofninum og skella henni svo inn í ísskáp í smá stund. Til að toppa kökuna bræddi ég svo ca. 100gr af góa karamellukúlum með smá rjómaslettu og sletti vel yfir rjómann. Ég leyfði karamellublöndunni að kólna smá áður en ég sletti henni yfir rjómann svo hann myndi ekki leka allur af.

Verði ykkur að góðu

erlaguðmundsdóttir

  
 

Ég sá að það vantaði alveg eina marengstertu hingað inn á bloggið og ákvað því að skella í eina núna á föstudaginn. Hún er einföld í framkvæmd og tekur alls ekki langan tíma. Hrærivélin mín var reyndar með mótþróa og var í 10 mínútur að þeyta rjómann, já 10 min. Ekki 2 eða 3 mínútur, nei 10 ! Ég á í smá love / hate sambandi við hrærivélina mína. Ég þarf helst að notast við eyrnahlífar meðan hún er í fullu fjöri og jafnvel taka blund. En henni tekst ætlunarverkið á endanum, það er það sem skiptir máli. Allavega hér kemur uppskriftin af þessari himnesku tertu:

• 150gr sykur
• 150gr púðursykur
• 4 eggjahvítur
• 70gr 70% súkkulaði (saxað)
• 3 bollar rice krispies

Eggjahvíturnar + sykurinn þeytt vel saman, í ca. 10min eða þar til deigið er orðið stíft. Næst er saxaða súkkulaðinu og rice kirspiesinu bætt út í og hrært varlega saman við með sleikju. Ég notast ekki við form þegar ég baka marengstertur heldur tek ég hringlaga form og legg það á bökunarpappírinn og strika í kringum og geri útlínur. Því næst skipti ég deiginu í tvo parta og dreifi deiginu þannig að það fylli upp í hringinn. Bakið síðan báða botnana við 130°í ca. 50min. 

 Fylling:

• 300ml þeyttur rjómi
• 4 kókosbollur (niðursneiddar)
• 3/4 askja af jarðaberjum

Þegar botnarnir eru klárir og hafa kólnað þá skelliði fyllingunni í millið. Ég þeytti rjómann og bætti síðan kókosbollunum og jarðaberjunum saman við með sleikju og blandað því vel saman við rjómann. 

Ég skreytti kökuna síðan með blæjuberjum, jarðaberjum, bláberjum og bráðnuðu karamellupippi.

Verði ykkur að góðu

erlaguðmundsdóttir

Þá er mánaðar ferðalaginu um Thailand víst lokið & alvaran tekin við á nýjan leik. Þetta var án efa skemmtilegasta ferðalag sem ég hef farið í og mæli hiklaust með að þið kíkið í frí til Thailands ef þið hafið ekki gert það nú þegar. Það tók sinn tíma, en á endanum lærði ég að elska Thailand og get ég ekki beðið eftir því að koma þangað aftur. Landið er ekki bara fallegt heldur er maturinn þar hreint út sagt ljúffengur, það var það sem kom mér hvað helst á óvart. Ég er nefninlega mjög feimin við að prófa eitthvað nýtt og öðruvísi en eftir vikudvöl í Thailandi, ákvað ég að láta til skara skríða og smakka matinn. Sé svo sannarlega ekki eftir því.  

1.   2.  

3.  

1. Red Curry , 2. Basil leave chicken, 3. Chicken Pad thai
Þessir 3 réttir voru allra uppáhalds réttirnir sem ég smakkaði. Allra uppáhalds var þó Basil kjúllinn, þó svo að hann hafi verið 18 númerum of sterkur og reynt töluvert á þolmörkin. Ég ætla klárlega að prufa að elda hann hérna heima við tækifæri og mun að sjálfsögðu deila útkomunni með ykkur þegar að því kemur :). 

Ég ákvað síðan rétt undir lokin á ferðalaginu að kíkja á matreiðslunámskeið í Phuket og kynnast aðeins thailenskri matargerð. Ég skráði mig í Pum cooking school og fékk einkakennslu og fræðslu um thailenska matargerð, það var alger snilld. Á námskeiðinu lærði ég að matreiða þrjá vinsæla thailenska rétti og var útkoman alveg ágætis miðað við fyrstu tilraun, þó svo ég segi sjálf frá. 

Green Curry – Þessi réttur var ljúffengur og er þetta uppskrift sem ég mun klárlega prufa hérna heima. 

Tom Yum soup – Þessi er svona hot and sour rækju súpa. Ég var ekkert rosalega hrifin af þessum rétt, fannst súpan full súr. En þetta er samt einn af vinsælustu réttinum í Thailandi.

Rækju Pad thai – Pad Thai er einn vinsælasti rétturinn í Thailandi en algengast er að gera hann með kjúkling. Ég varð fyrir miklum vonbrigðum með þennan rétt en Pad thai er einn af mínum uppáhaldsréttum. Til eru margar útfærslur af honum og var þessi alls ekki góður, en ég mun finna góða uppskrift af honum. Ég SKAL finna hana. 

 

Curry paste í bígerð.

Snillingurinn sem kenndi mér, man núll hvað hann heitir.

Ég afsaka hvað þessi færsla er þurr og leiðinleg, massív ritstífla að trufla mig þessa stundina. En ég mun bæta ykkur það upp með uppskrift af einni ljúffengri köku um helgina. Það sem ég er búin að þrá góða, blauta og mjúka súkkulaðiköku í heilan mánuð ! Þangað til næst . . 

erlaguðmundsdóttir